بهديك الفترة كنت قارئ كتير عن قوّة الارادة، وكنت اعرف كتير منيح كيف اتحدى حالي وكيف أشد على حالي حتى أنجز المهام اللي علي. ولكن ولا كان عندي الإدراك الكافي عن اهمية الصحة النفسية، ولا كنت اعرف اسمع لحالي من جوّا ولشو انا بحاجة. كنت اعرف صبية اللي بتروح عند معالج نفسي ونصحتني اروح اجرّب. رحت من باب الفضول اجرّب وبالفعل الاشي كتير ساعدني. اذا بنظر للوراء، بشوف انه انا كنت من زمان ابحث عن هذه المساحة ولكن زي وكأنه كنت استنى هاي الدفشة من حدا يقلي: "تمام اذا بتبدا تهتم بصحتك النفسية". 

 

العلاج النفسي الكلاسيكي ساعدني في البداية إني أفتح وأعبّر أكتر، ولكن بعد بفترة شعرت إنه في بعد إشي ناقصني. صار عندي فضول أتعرّف على نفسي من خلال طرق وأساليب تاني. بلّشت أستكشف العلاجات النفس-جسدية، وأتواصل مع مشاعري وجسمي من جديد. دخلت عالم التدريب والتنمية البشرية، وهناك تعرّفت من جديد على أفكاري ومعتقداتي. من خلال التشي كونج واليوغا، حسّيت إنّي عم ببدا افهم واستكشف مجرى الطاقة الحيوية اللي فيي.

 

ومن هون جاي فكرة التدريب الشامل – تدريب يشمل الجسد، والعقل، والمشاعر، والطاقة.

 

الكل حكالي "مجنون" لما قررت أترك مجال الهندسة واصير مدرّب. يمكن فعلًا انا مجنون… لأنّي جرّبت الحياة "الطبيعية" وفهمت انها مش لإلي. هدفي انّي ألهمك انّك تكون/ي "مجنون/ة" بطريقتك الخاصة، انّك تتبع/ي صوتك الداخلي وتآمن/ي فيه. 

 

في النهاية، "مجنون" و"طبيعي" هنّي مجرّد تسميات نابعة من الوعي الجمعي للمجتمع الحالي. كلشي ممكن ينقلب كمان اكم سنة. هدفي انّي ارفع هذا الوعي واحكي عن اهميّة طريق التشافي والنمو بمجتمعنا.

بالآخر هذا اكتر مسار طبيعي لكل انسان بوصل لمرحلة وعي معيّنة. لكل انسان بصحى بيوم مين الأيّام على حاله وببدا ينزّل عن حاله كل شيئ زائف ومش لإله لحتى يستكشف ذاته الحقيقية. 

 

هدفي أخلق مساحة آمنة ومُحبّة لكل شخص في هذه الرحلة. مساحة بدون أحكام، بدون ملام لأنّي بعرف انه النفس الإنسانية بتتشافى فقط وقت ما تُقابَل مع تقبُّل تام. هذه المساحة إلك عشان تجيب/ي حالك بشكل كامل فيها — تجيب/ي الجوانب الحلوة تبعتك، وتجيب/ي الجوانب المظلمة كمان. هاي المساحة راح تدعمك إنّك تكون/ي انت… لأنّه العالم محتاجك. وأفضل إشي ممكن تعمل/ي للعالم هو انّك تتصل مع نفسك، وتلهم العالم بحقيقتك.